والله اني كنت ألوم اللي يضيق إن غاب خلــــه..<<< مرهـ روعــه

والله اني كنت الوم اللي يضيق ان غاب خله /// لين جربت المحبه والفراق وقلت توبه

لعنبو جد المفارق فيه هم وفيه ذله /// اثر كل الحب لذه والفراق اكبر عيوبه

امس فارقت الغلا ومفارق الخلان عله /// والعلاج الوصل لا تبلش طبيب ولا حبوبه

الزعل هو سبة الفرقى يهز الحب كله /// ليتني طولت بالي قبل لا يعلن غروبه

واهني اللي وسيع الصدر صدره وسع فله /// غلطة الصاحب تجي وتروح ماهي بمحسوبه

سامح الله طبعي اللي لك تغير يالعله /// قاضب خلك عزيز و لين صارت لي عقوبه

ليش تحسب غلطة الصاحب على الصاحب مذله /// ليش ما تحسب ميانه لو تجي عشرين نوبه

لا وربي كنت احبه حيل ما دورت زله /// لا تشكك في غلاه ولا تساعد في هروبه

لا يمي قبلك تعبت الوم شعار المجله /// وكنت مؤمن في مقولة اعذب الشعر الكذوبه

واثر كلاً في حياته له تجارب مستقله /// وانت لا تشره على مثلي وتبلا لك بحوبه

كان جابتك الحميا روح له تكفى وقل له /// لا يخليني واذا وده يخفف من ذنوبه

يستخير وله غلا قلب صدوق ما يمله /// فدوةٍ له كل قلبي من شماله لي جنوبه

يوم قفا والخفوق يفوح عقبه فوح دله /// وسط وقدة واحدٍ عز الشتا والسهر دوبه

لا تقهوى بارده من برد فنجاله وزله /// ثم قربها على جال الجمر وارهى شبوبه

وين يدله هالخفوق ؟ وكل ما يدله يتله /// طاري اللي ياكثر ما اتعبت رجلي في دروبه

لا طرى جريت ونة من بلاده مستحله /// مثل ماراحت بلادي مع شعارات العروبه

كل هاجوس يجيبه جعل شعري فدوةٍ له /// واعذابي كل ما جابت لي الجبله هبوبه

مشغلٍ قلبي بحبه دون خلق الله من الله /// هيه ياللي ممتكلني حسن واسلوب وعذوبه

ماسمعت ان الخوي له بالخوي تسعين زله ؟؟ /// وانت طوف زلتي ياعل تفداك اللعوبه

صاحبي سيف الهجر لا صرت تقدر لا تسله /// ما تضن العفو عند المقدره اكبر عقوبه

ايه انا اللي كنت الوم اللي يضيق ان غاب خله /// لين جربت المحبه والفراق وقلت توبه

للاستماع للقصيده بصوت شاعرها ..
اضغط هوووووووون




http://www.w7m.org/2008/Jan/1204193031.rm

تــحــ الأمــيــرةــيـاتـي